070909 milulureyan ed danum

MANONTON DALAN

alay samit na palayupoy na dagem
ikuyakuyab turay luputa akabenben
unkuykuyep iray matan mantalineng
naalawat na imis so lupa ran mabeleng
diyad takdang wadmanak ya mankunineng
ed daluyon iran manlalbog tan maniweng

amataan koy agin milulureyan ed danum
abasa lay amina kalasian to nen apayurong
unelekak komon balet siyak so apasikmatan
say linggis mi nansuldungan, nantalusan
aguyor iray salik, intarok toy maaron likna
maples ya bekta, wadmanak lan miistorya

akabat kon taga palpalandey ed amianen
akabasyon kunon mangilingway ermen
aliling to kunoy daluyon unsabi unarawi
mantatabugis, manung-ungol anggan labi
inkuanto ni “ ed wani naladladsak sak-en,
sik-a dawat ko nantettewa intednag sin tawen”

(natan malikeliketak sikay kerew kon timmuan
inpelag na tawen--kankanaey)

say arom salbay bilay ko

MANONTON DALAN

masiblet ya lurem
say uran et gemgem
atikag laray paserser
amagaan laray lawer
say dalan et marabok
no nasinglot, makaukok

unleletak laray kapageyan
tangtangayen day tawen
kansag na sali, bibil mitimiti
unkekerew na panangasi
say kanonotay asukbungay paga
ta say anien et naiyutang la

nakgaan lay teek kon miaabagey
mansibsibekak tarok toy ey-ey
kato nimet so insabi abiso
ya say bayar kod koryente apaso
balet inaro agko ratan ikaskaso
no wadiya kan lanang ed abay ko