utang

kuwatit agka makupit mikalabindua
manonton dalan

“uhuhuhuhu ... uhuhuhu! ... nana puring pautang yo kami pay kapalduan salop ya belas ... ta agni nampawit si tatay ko” inkuanen tessie ya singa aterak so boses to. atenyeg so liknaan nen nana puring anengneng turay bimmibiler ya taklay nen tessie. “agi anako antoy agawam akiusilan kad kakawayanan o binasigan kala met nen inam ... kaskasiyan kayo met ya ugugaw maruksa tay ina yo” kuanen nana puring. “ pinekpek daak nana ..huuuhh....ta agko labay so unlad diyan mi-utang ...huuuu... ta..ta... dakelay utang min agnababayaran” tarok lay terter na lua toyay ugaw. “ibagam ed si inam ta labay kon nakatungtung natan ... no ag-unnad diya ipapulis ko ed panabuso to ed sika” kuanen nana puring.

anempet so ugaw ya abalkot na takot balet anggapoy nagawaan to, no agto ibaga, leweten da no ibaga to ... awey no antoy kasumpalan. “inanggggg...inangggg... naka yo kunod garita nen nana puring ta katungtungen dakayo nipaakar ed utang tayo” ag akasalita so inato ... limmad sukong ya singa akusbo so pagew... insan manterter met lay luwa to wala met ni atilak ya baing to. on masyado lay ir-irap dan sanina. no walay probleman unsabi si tessie so pangipapasan toy sakit na linawa to aliwan samay anakton laki ta uga-ugaw ni insan sakiten.

mabetbet so isaew dan mangan, masuwerti la no makapangan iran mamindua. si tessei ayuyang toy pugaro ya sisimawen turay kabayawasan anggano sabong buburburen to insan to asinan. say agto naakan isempet tod si agi to. agni makaketket ya maong kanyan ngalngalen to ni insan to ipakan. aliling day saninan billit. si ina to met ed milalabada, maminduad sakey simba met ya walay nalabada to... iyinum to ni arum ... panangilingwan siguro met na eras tan konsumisyon.

si tatay to met ... say unor ya balita mantratraysikel ed san fernando, la union. wala met amoy kulasisi ton ilokana ya mapaspasnok kuno, kanyan singa tula inkaindan so pamilya to. no maminsan wala met so naisusukib toya ipapawit to. agto met ni naanakan may kulasisi ta telek lay kikinutan to. atay aminsan akasempet met kalamor ... walay taruktaruk ton limaran kaban ya belas tan malaem met ya pinanbayar na utang da, balet sarayay manunur-unor iran bulan singa asikmat ... bemmetel ya amin.

akumbinsi toy laman ton dili ya laen nen cora(ina nen tessie)si nana puring. mila met laray anak to. pimmaway ira ed sakey ya al-alulong, anggapoy takayan... no simento nayarin tawagen ya bungalow(abung low)... aya sakey ya kuwarto ugipan... kusina...tan patagwab ya kawalan daray yurongan, lamesaan, dulang, anggapoy koryente... lamparaan ya pinespes ed ganusal ... larak so kuwandad manaoag... say kasilyas ... unnarad bangkag ya untungir... dimad silsilong na bayawas, anunas, piyas, tesa,guyabano. kawayan, lanuti, atis o diyad sanib na ponti. wala met so bintana ton apatira... say atep to bulong na niyog ya pinaor...dingding et bulong na silag. aliber met na alar ya tagumbaw tan madri kakaw. wala met iray akasukitsukit ya kamote, palya, talon, walay animeran sengeg na pontin lakatan, duaran kaimito, apatiran manbubungan niyog tan sakey ya piyas. manlapud mad puerta anggad kapot na alar et adasigay halo blaks ta piyan agka unkutep ed pitek o nateneb so salim.

akaeba may bulirek ... untutumbok met si tessie... nanonotan to nen inbiyek ya taon ya intulor dad klasi ton unaan ya grado... agay lay paga to nen saman agmakareen so nonot to no antoy gawaen na maestra to ... no maruksa met ya singa ina to. agay lay liket to nen akabatan ton maomaong so maestra to tan saray kaklasi ... kanyan sikatoy numero uno ed klasi. natan walay paga ton ipapulis day ina o anggapoy iluto rad sayan agew.

manasingger irad garita nen nana puring... say pagew nen nana cora so manbagtog singa manbabayoy inlambong ya kahoy... meremere ... manrorosario ed nonot to. aralem so pirawat ton ipulisay so mauges ed dalan da. “ tessie anako ebam payay agim ta piyan maaliwalas kon nakatungtung si nanam puring” singa maamon karnero inala toy agi ya biglan akumpil so bibil to lapu sigurod eras o lablabayen toy ina to.

makakaimis si nana puring... dinerewan ton tampol si tony(agi nen tessie) na biskotso ... tampol met ya pinankadwa nen tessie ta unmemesmes lay eras ed eges to nimani. mantitit si tony ta say walad nonot to et parad sikato labat ... agto ni naaral so mangiyapag na grasiya... agni asiplog na panangasi so malangwer to nin kanonotan ... “ itdan moy atsim ... aliwan maong so bukatot” kuanen nana puring; si nana cora balet “ duga latan makataway kay tsinelas”... singa narep ya lampara ... mareen si tony.

“ atsi cora abayag lan labay takayon nakatungtung nipapaunong ed say utang yo tan naimanok nen kabuasan ya si tessie et naames na biler ... manakis kalamor ya miuutang na kapalduay salop ya belas. anta yo walad uley ya ag nepeg ya dapuan iray ugugaw ... no walay mandalem ed sikayo siguradon alaen day anakyo tan napriso kini... laot la ta uni-inum kayo... natalusan koy kikipasen yo balet no say sakit na kanunutan tayo et ipapas tayo ed anak tayo .... singa tayo ayep ed satan” kuanen nana puring.

“ benger tana ugaw agto mangikaskaso no katungtung ko ... telek ... kamamantaan asikmat la ... agko la narumog ... no maminsan sakey agew ya anggapo... wadman ed kakapinsan tod pugaro ... pulpulyanan toy agi to... palakar” kuanen nana cora. nanengneng moy lupa nen tessie singa to labay ya eyeyag so salitan “matilaaaaa.... matilaaaa.... ketketen ka komoy gelata” balet diyad takot ... akakuliseng labat ya bebenbenan toy agi ton akalmo lay biskeg ton mandapoypoy ed dabok... biskotso labat tan ha... no priton iknol siguro mi-usilan lay tony.

kamamantaan intagar nen nana puring si nana cora dimad beneg. abayag iran nantungtung no arum narengel moy agmankatalusan ya besngawan. balet diyad sampot nanpaknaan ira.

“tessie anak galad diya” nilakap nen nana cora si tessie insan akaakis na telek. manakis met lay tessie tan mansibsibek. “ anako diya kanin manayan ed kindi nana puring mo piyan natulungan moak ya pabalegen yay agim... no makaka-iliw ka nayari kan unsempet” ... “ agko labay....agko labayyyy” masyadoy pangukuyung dad sikato.
diyad kasamputan atilak si tessie . inmalis si ina ton walay awit-awit ton balkot sakey lad man so sakey salop ya belas ... gaygayugoy toy tony ta agto labay so umsempet labay toy mila ed si atsi to.

si nana puring walaray anak to balet wala rad manila ya manaral kanyan bukbukor dalan sana-asawa ed abong. marakep no wadman si tessie ta naibaan turan man-asikaso na garita tan manlinis na abong. aliwan tanton ambelat so trabaho ta dekoryente so usar dad abong. say mairap labat siguro et manames na aso ta magantil may aso ra. sakey ni wala lay mansulong na aramay kawes ya abalegan na anakda. maong met ya mandait si nana puring kanyan daiset labat ya tabas dugaruga lad si tessie.

anggaman untan agto nakakaiba may agi to malikeliket so bilay to... agto la unsasaew ed panangan ... no maminsan walay malaem ya panangan ibaki ran mangitulor na baaw tan pising para ed si ina tan agi to. medyo abawasan met lay kakainum nen ina to.

saray bulong na panaon maples ya naikupin manmamarikit lay tessie natan, inturing da met lan anak. asumpal met laray anak nen nana puring walara ed amerika kanyan sikato lay anak da, in-gawaan dalay kasulatan ya inampon da. uso met ni so utangan... on wala ni ray matiwer .... aliwan satan labat wala ray matila say kuanda akabayar lara anggan andi. wala niray mamasnok no agmo ra pautangen ... singa nira ari ya mangibaga.

baleg la natan so tindaan da ... groseria la. ipapanta nen nana puring ya suwerti toy tessie kanyan say ngaran na groserya da et purtess groserya, ngaran nen nana puring tan tessie. wala lay libro natan na utang ya ginawa nen tessie tan promisa no kapigan ka makabayar, anggad agka makabayar agka makautang. wala met so limita na nautang mo ... nagmawil ya singa bangko.

anempet met lay ama nen tessie pinabayes nen nana puring na isaliw toy traysikel ya duara insan to pepelagpelagan to ya sinimba. timmunda met lan manlalabada si nana cora. say ligliwa to et saray tanaman ton pisipising ed kaliberliber na abong da. wala met lay hasag dan coleman, aliwa lan lamparan niyog. kusinelya met lay lutuan da ya regalo na sakey ya anak nen nana puring nen anempet ya nanlapu ed new yok. akaawat met na balikbayan ya kahon ya kawes na ugugaw ya nanlapud samay anak nen nana puring ya walad texas.

no tepetan yoray anak nen nana puring... manelek ira...say ebat da ...”agdaka labay no anggapoy utang mo ... singa kami aripen na bangko ... sikatoya labat so itratrabahuan ... UTANG”



agyo ra duruksaen iray anakyo ta umbaleg met iran maruksa... sikayo ra so salming dad bilay da. antuey kabaleyan utang kilabat balet manbayar kayo... no andi usilan kayoy kolector .... say IRS... iguyor day amina ganaganam ... no say agi yo tepet mo no kerew o utang piyan malinew. sigi sirin kabaleyan ... mananos kila bat ta unsabin siyansiya so suwere yo. manaruan kayo .... no unkerew kayo lamlamang na perdona agyola komon ginawa anto. say Diyos manuna lawas, salamat md

anggan kapigan

alingwanan ko pinabli mikadua

manonton dalan

“uhmmmmp....ttssuupp ... kawalan to may kuwartom diya” kuankon inkindat. “alagar ka ta isilew koy.... uhmmmm” agtola asumpal ta tinekmelay sawa so lawis to, insan talikebkeban ... kamamantaan aliknak ya walaak ed dalem ya aalunusey serena ... ngalngali napaksot so anges ko... nen

“toktok... toktok ... bebeee...gala ta ibaan moak anako ta asingger laran unsabi ramay kakapinsan mo” kuanen auntie cely. abalikwas si bebe ... impulisay toak insan inanap toy sagaysay ta uksuyen toray buek ton singa ubong na sarakok. kalelegtaan ya mansasagaysay et mamasihen koy takeb to ya immaawet. immarap insan akipuliketketan ... intulak toak ... “magano... magano... ugip kala ta tulungan koy mamang.... ttssuupp”

abalang so pakaka-ugip ko asalatay agmakareen ya likna... indukol ko naangub koy ayamuom to ed ules ... nilakes koy malet so danganan ... singaak binalkot na ampetapetang ya aro insanak naibasileng ed suyok na lirep.

“ bebe aliwan say pibabalik ed sika anako ... manalwar ka... ta say laki et talagan laki anako” akaimis labat si bebe”... “ si mamang lamet singa agnanmarmarikit”.... “oooy! walay kaibak ya naynay nen umpasyar kami nen dadim”. nanari so kareenan nilakap nen auntie cely si bebe “walay ilalok ed sika anako”

singa abeka so karuman nen auntie cely alikna to lamet so petang na kalangweran. “ on kuwanto walay kaiba mi ya umpasyar ... si beth ya kapinsan ko so kaiba mi ya unlad bunuan nen saman”

“ betang... alingwanan ko manayay analiw na kokakola tan yelo ... manaliw ka met lay hopia tan puto” kuanen auntie. anta nen betang ya anggapoy nasaliw ya puto tan hopia ed bunuan kanyan unlad torres bugallon. pigaran oras taney... makapesnak lay nganak insan makapawil. anggapoy ese-esel nen betang ta lalangisan nen ...

“gregg ... pinabli labay koy manlangoylangoy... amay kuan mon bangatan moak ya unlangoy” kuanen auntie. aliwana nin uso nen saman so bikini... mankamisita ka tan walay antikey ya pantalon nayari o bloomer... pati bra ... matalag ni man-uusar. diyad saraman ya panaon talagan sapitsapit ni auntie ya anggad natan sweet 37...umpultak so serbesa no nadapigas to ... saray babalulaki et mabetbet iran maka-akmon na apangat no unlalabas si auntie.

singa unne-nengneng ed salming ya mandaddaiset ya umpapawil iray bektan akatenyeg na kamunduan nen auntie cely... mabetbet ton ikupit so bibil ton ... ikirem toni mata ton..

makasigam ta singa memesmesay anges ton ....”unggh.... greggg ... umpan nalenerak medyo aralem lad diya” lapur takot o anto kaman ya akakalawit na liknaan ....nalmo toy laman ton akapalkap ed pagew nen greg. “ agigi... katawan kon Diyos” kuantod kasiksikaan to nen singa alemay iray pueg to lapud betel na danum o petang na lakap... singa tunawen toray dasal na kareenan.

singa akakulagtit ya pantat katekep toy karot ya magingintil ...”bastos... karapas” diyad inlugtot to agto naimanun say kamisita to et naunor ed idadapo... asabit ed takeb ... natan akaparungtal iray sanagin tapaya na bilay ya pirarawat daray matudyon mata ya anggan kakirem et naimatunan dan umpayawar. tinamtampol nen greg ya nilakap... narep so pasnok nen auntie ... asaltay amo tan peles na parok na pagew ya akilala ed agos na daluyon ya untatapik ed tambib...abagutay sabit so pagew binmusel so aron makalingwan na amina ganagana... nen alikas toray gamet ya unkukurong ed ulpo to biglan ......”agigigiii” kuanen greg, dimpakan day iknol ton ngalngali makapesnak.

anggaman untan duma lay imano nen auntie singala talabad pantal .... agnasukit .... naynay ya akasabit ed diking nen greg ... nen unsabi betang abaluan tula ya abetag lay bangad manaoag tan emmepas lay reynad trono ta insalat tod aro... ngorongoro si betang ya limmad silong na niyog ... bitbit toray sinaliw... ta agda-anggan tinulungan ....pati eras alingwanan da. diyad buwisit nen betang impapas tola ed puto tan hopia ... manmugmugkal so aping to ... maka-atot-atot lapud ininum ton kokakola....siguro ampetang so loobloob to ... manasewek kanyan atot so labas to.

diyad labin mareen ed manunur-unor iran agew singa pusan agmakakisen si auntie cely...

nagogoligol so nonot ton agto kaibay greg. mabetbet so akar tod kendi betang piyan walay baraan. sakey ya labin limmaray ateng tan agagi nen betang ed inateyan ... akabatan nen greg. say ginawa nen auntie cely inyamot to may koldon na radyo insan to imbaki si betang ya alaen toy sakeya koldon ed abong da, sakeya kilometro met man akaren mo ni... insan si betang malabay ya miistoryaan.

agni akaepas si betang akapuliketket lay greg .... “umpan lolokuen moak labat ... isambam ed tawen tan dalin ya agmoak ikakaindan”... “ on tawen tan dalin tan arum niya” nakurkuramil lay greg. asalaran day swits na silew .... narep ... atalukbungan iray bilunget....”ungnghhh ... alelegggggg... ugngngh” narengel iray kalasukos tan tanol na kawes ya umbabasileng ed dingding ... “ gregggggggg.... pangasimmmmm.... ugngngh...

aaaahhhh...”

“ugngngnhhhhhh!!!!” “ mamang!!!! .... maang ... antoyyyyy nagagawa” atarantay bebe

“ anggapo iyalaan moak pay danum... apaetak labat” kuanen auntie ....” abaluan kuno ... unsusulag kayo .... aaaay tinaktakot yoak” diyad nonot nen auntie so liket tan gayaga dosas na abekan iliw ed akalukip iran bekta na aruan katekep toy liket na laman. “ bebe asikasum iraya ta manamesak ni ta angub kawaliak la ... kababaing no unsabi ray kakapinsan mo” .... hmmmmm

nanapuran simmegep si auntie talos toy banyo.... benben toy buek .... inpatundiris toy pagew to ... inaplos toy puson to ... wala lay napirit ya taban daiset... intagey toy ulpo to nakaukulan to lay eksersais .... alinggis toy kilikili to nakaukulan lay blid... ami-amin punakpunak ni... heee kuanto. binukay toy klosit nalmo toy kolor na buek pati blid, nail polish, lipstick, nail cutter, cuticle remover, acetone.... yeeee akatarya lay amin.

wala ni tareren ton manames, binayagan toy igor tan tineneb toray liknan unkekewkew ed dalem... say imis toy anggad layag kasumpal ton amasahi ampetang ya danum. medyo makusnaw ya morena lay buek to nen limmabas. angalay olive of olay lotion sikatoy immasahi tod amina laman to. .. insan in blow dry toy buek to... ginawa to met lay kuko to. anonotan to may simbangan ya abayag lan akapireg... sinalsali to gintinan sakey ya sali labat .... nanparungtal so 60 libras... telek telek agto naitepel ya igatin toy duran sali to ... inekal ton amina kawes to ta piyan aliwan tanton ambelat ... inkirem tom in-innot ya timmuon ... manateet so simbangan singa wala manungik ya belek no ungalaw... nen anengneng toy simbangan ya 140 libras ... “matila ka... matila ka” so naibesngaw to.

diyad tagey ya limaran piye tan limaran pulgada ... balibali nitan anto... naka-ukolan balet ya anggapoy meriyenda, ayskrim, halo-halo, adobo, putsiro, igado, karikari .... uhmmmmm... uneyas kasi auntie no gawaen totan... pinirit toy tapi to ... malamalaman la... ginemgeman toy lawis to lamet... matabuyak... no pangganakan ... maimpilya. nila toy sipi na kawes to nen saman ... nanpili na ikawes to.... singa pungol so asimsimbon ya kawes ... nayarin kimmusen so kawes o limmebag so laman lapud atalem na danum ... agto la naisulong iramay kapri to kalamor... aramay momo so nayari ni ....balet singa manlulupan balay bayan.

limmesad kalakal ton unlalangwer ...( no niyog amay kakayuren) ya man-eks-sersais kuno, pising labat so kanen, danum labat so inumen to tan ikuno tod samay kaanakan ton dayatisian no antoy makapasiksin panangan. nambabangil ya anonotan to ... pati labatiba, laypo saksiyon tan jenny craig diet. diyad kanonot aplastadon akalirep ... singa akatirakyang ya patang ya lakseb.

kamamantaan sakey ya kolor dapol ya uleged abong so abalikwat lapud agulo so ubong tod sipi ... dati akabalaybay ed saray kawes ya manalagar na otot ya abalang ... masarag lan abasto ed sakey simba. asingub toy balingit tan petang ... matantan ya mankiwelkiwel tan diladila ed dagem singa tatawayan toy siplog... insurob toy ulo tod akabunton iran kawes. pimmaway manendereng so ulo to igagawat tod katri ... asingsingger la ta walad tapew na bunton.

“ gregg... laseg kan nakiki-ak ditan .... greggg... anakna ambetebetel so limam .... gregggg...hehehehehehe... talagan anggan kapigan... karapas kan talaga ... ungghhh

....unggh” .... “ greggg ... lakad tagey... atan.... atatataatan” nen biglan

“aaaaagigiiiiiii.... ulegggggg” boggggg..... blagggggggggg... batik si auntie ... tikeltikle toy uleg... agto antan labos lakseb iran ... batikabatik ... limmepsag.

“manggggg...” ataranta met lay bebe ta antakot toy uleg... agto antay gawaen to no salukbungan toy kurtina o itdan toy kutsilyo. diyad gulo abaliwat si elly. akabatik lad paway si auntie ... imbasileng toy uleg... timmumbok si elly tan bebe ed labas ... ambilbilunget kanyan.

“mang....mang... kawalan yo” tawag nen bebe... mangiwgiw si auntie... agto naantaan no panon akasabid paway tan manugaog nen naantaan ton.

“agiiiiiii.... abalang so pistakoooo.... huhuhuhuuhuu.... bastos kan talaga anggan kapigan...pati kugip” abalkot na kurtina si auntie kukuyungen da.

kaskassiyan met si greg amina nagawad si auntie kaslanan to...hmmmmm... tuwa kasi. anto kabaleyan no naugip kayo sigurado yon walay kawes yo ta no bilang oras ya unalis kayon anggapod oras et agda naimatunay iya-amot yo. maong labat no anggapoy silew... balet say karapasey.... hehehehehehe... manaruan kayo, say Diyos manuna lawas md

pista

kuwatit agka makupit mikalabinsakey

manonton dalan

“ bingggggggoooooo...bingggooooooooo” eyag nen itiw, nantatabugis so pinabutan mais pati inumen ya kokakola naibung, manluglugtot ya mansayawsayaw. “ ooy pulon anto may sampot ya numeron pimmaway ... 16 awa” tepet nen inyong. inpanengneng nen itiw so bingo card to... talagan analon talaga....pakuros ya bingo masayadoy parayew daray kakakaiba to . walalay isaliw day bagisen tan puto ed tindaan nen nana durang dimad gilig na plasa silong na akasia, asingger na tanki danum.

intagar nen itiw ira di inyong, pulon, andoy, atong, jocey, kay, pearly, atsi pas tan si bulirek. kasabirad kindi nana durang... naangub mo lay alingasew na balon luton bagisen tan puton gawad bakor... amay amputiputin no tapiken mo et medyo ungiwgiw ni ... no makapoy lay matam nabaluan mon tikoy.

“nana dura amay bagisen ko aruman yoy sili ... terak yo lad tan” inkuanen pulon. magsi-alig ira. sansakey iray yaong ya inpatapew ed plato ya walay duaran gerger ya puto tan sansakey ya bason pepsi. si inyong balet say labay to pinapaitan tan pansit... untan met ed si bulirek... alig-aligen toy kuya to.

walay kalokowan nen pulon nanpatelab na makmaksik... masyadoy garakgakan da. si atong balet aliwan sanay ed sili kanyan manngisngisiw tan akikerew na puriko ya iyan tod dila to. si jocey, kay tan si atsi pearly no unsubo ra singa bibil na bangus ya unkikitkit... kasumpal to punas na napkin... makalkalna singa manpapasuyot ya genggeng ed bilunget... wala ni imis-imis to. saray lalaki balet singa alimbusabos ya unsusupsup na sabaw... maingal ni.

agmakareen so mata nen itiw mabetbet ya untatakiling ed silong na lamisaan.... insan to eyesaes ed si pulon... manelekan ira... nasisikig lalaingen si jocey ta akashort-short. kamamantaan. “agigigiiiiiii...” kinarot nen atsi pearly so layag nen itiw “ deen ka itiw nayuyugyug so lamisaan, agko lalaengen naerel so laman toyay bagisen” kuanen pearly. “ gungunam... beeee...” kuanen jocey . si kay balet migagalaw ed si bulirek...agto naupot so kanen nen bulirek kanyan inter to la ed si atsi pas. akikerew met na supot si atsi pas ta pamalkot tod samay pansit... umpano walay naerasan.

makakaliket si itiw ta binayaran nen atsi pas so kapaldua piyan wala ni kunoy ibayar dan unlugan ed ruweda. si itiw, atong, tan si pulon angala niray sansansakey ya yaong ya bagisen. saray bibii agdala labay ta umpan ipaway dala labat no nakalog irad ruweda.

akipila ran amin ed ruweda... nibana met ya wadman si pangamaen min tony... angiderew na limaran tikit kanyan say sinaliw nen atsi pas ya tikit et sakey para ed siak ... akalibri laray bibii. si bulirek labay toy mila ed si atsi pas tan si atsi pearly. si itiw kaiba toy kay, si pulon, andoy tan si atong sankakaiba, so jocey kaibak.

no amay manpatagey ay balibali balet amay manpalusor .... aaaay agi singa nauksot so aangesan mo tan say pait mo singa labay toy unsiyan... nen amay manunaan ya telek ... singaak mibabalsakan ed samay balatyang ya akatapew ed ulpok... tan akakiremak ni tano imulagat ko nasiplog na dagem makaakis-akisak kalamor... nen amay manbaybayag la singa asanayak la ...naibesngaw koni.

“ maseksekder latay salim ed kakaprino” inkuan kod si jocey, akaimis ya kinarot tuak ed diking. naka-ukulan no mitungtung ka iyasingger mod layag to ta maungol may ruweda ... makalarakar... singa nababagbag. no maminsan unla may pagak ya napaktak insan singa dalig ya mantulintulin..... eeeeeeehhh!

singa nakal ed nonot ko nen mitutungtungak akamesmes manaya may limak ed ulpo to agtoak met kinarot ... balet singaak akoryente nen minuldagatan toak. “ aay!pasenya kala... “ mansibangot.

diyad toktok mi balet maneyag si kay... mandepadepa ni singa samay taytanik... unsisibang ya agila... mankarag ni... pati si itiw mandepadepa met ya ibabando toy kangaranan na nanenengneng to. aramay taluran bubulog so mantutupak iray ukis na mani. si atsi pas agla amo una-anges mikakasi siguron nasumpal la komon, sag paminsan kakaweyan ko piyan naitday ligliwa ta singa atalod giranggirang(kulogkulog). si bulirek ambabangil ya ituturo to medyo ambilunget la umpaway laray silesilew... tan wala ray seselselan dan kuwitis, bawang, labintador. wala niray banda ya mantutugtug ed plasa.

nen amay kaepas mi singa say dalin ed unyuyugyog... singa alemay so puweg ko ... insalar koni daiset ed padir baraan koy naksawan. siguro aliwan siak labat ta aramay arum wala ginames ya ulnos na bayawas ya aanguben da. di paypay niramay arum. wala met so atakiling kon mandulok o man-utyak.

wala may kabat min manpapa-halohalo si atsi beth, walay langka, sago, agayep, malangwer ya niyog tan ayskrim. nen alikas kon naksawan lan mankukuskus na yelo si atsi beth... inyesaes kon tulungan ko insan aruman toy ayskrim may halohalok. “ talagan sikan ugawan ... pati siak aatitan mo” inkuan to ... balet inderew tod siak may panagkuskus. nagmawil lalaengen ya magsikuskus na yelo. si atsi pearly so seksi ya mankuskus ... unsasayaw ni babansagan to my tugtug ya “celebration”... wala ni pagiling-giling to ... elekan kamin elekan .... magsisayaw met lad satan.... malikeliket kamin amin pati si atsi beth.

maingal lay peria ... makapakapal laray totoo... diyad arap na munisipiyo wala may andukerukey ya tolda diyad silong to so nanduraman galaw. walay bingo, wala may walad pegley et nan-aabay ya botelyay pepsi ... say gawaen mo manaliw kay tibukel ya singa singsing sikatomay isiyut mod tenger na botilya... makala kay primmeyum ya monyika, manpili ka ... walay bakes, barbi, patang, bear, uleg, manok, bakukul.

wala met may animeran nantutuunan ya kiyew korti botilyay pepsi talura ed lepsag, duarad pegley tan sakey ed toktok. itdan dakay taluran bola... say gawaen mo tupaken mo... no apatumbam ya amin walay primmyum .... monyika lalamet ya gawad tsina.

say nilaan mi amay walay adasig ya lupay bibii ya say bibil da et akasangi... say gawaen mo pusitsitan mo may sangi da na danum ... say nagawa umpaway may lobo ed toktok ... mas dakel ya danum so naiyan mod sangi mas unbaleg may lobo anggad umbetag. no siyopa so akapabetag ya immuna sikatoy analo... on walay primmyo.

“isaaaa.... duaaaa... talooooo.....gooooo” kuanto may maganganan marikita ya tagasingil ... kon todo togtog “walk like egyptian”. kapirit nen pulon pimmugsit insan singa apilkon sirit agmakatundas .... walay immeyag na ...”viagraaa....hehehehehehe” kanyan say ginawa to pinusitsitan toy atong. si andoy balet aliway nakna to amay biin manpapataya... akakulkulagtit ya batik ed beneg... apagewan agi ... singa la “wet t-shirt contest” ... mabakabakat lay ganagana to. si itiw dugaruga may pusitsit ed sangi to may bii balet anggapoy umpapaway ya lobo kanyan .... limmoob insan to pinangkulan ... aman pimmaway so lobo... asagur amo kanyan ag umpaway. kamamantaan

“pook!....yaaaaaaay!” aka-eyag-eyag na baklayan si jocey.....” analuwak!!!.... analuwak!!!... analuwak!!!” panpipilien da monyikan bakokol o sakey garapon ya kendi pinili toy bakokol singa kabaleg na danganan... balibali ed panaoy mamauran... aaay nanengneng moy liket na too no manalo unkirlap so mataran singa walalad gloria... wala ray maka-akis, walay maneyag... manlugtolugtot ... walay lakapen dakay malmalet...wala met may nalupoy ya labay toy uninum na danum.

marakel ed sarayan bekta et nagagawa diyad agew na pista ya angga man iner so kawalan tayo no maminsan unsibang ed kanonotan et makatunda tayoy daiset insan itdan tayo na pankanawnawan umpawil iray alibangan laran liga lapur karakel na aasikasuen tayon mangipupuger... antak wala ra met so akasukib ya apalabas ya amamayoy nonot yo ya nayarin iyapag ed saray maaron matan mangiter na bilay.

pasyensiya kilan kabaleyan ko ta narelak na trangkaso; sikatoya so sakit ed bukig. say irap to pawilpawil. no walaak ed manaoag siguro binalkesan dak lay ulnos na dangla tan inames dak lay banaba, subusob, palatang na silag, urigano, tangkay na punti tan usang. umpano labatiba ni piyan unepas so petang et ag- unsulag...hehehehehehehe. sinalik so agnampatambal no nayarian kon labanan... simmakit lalaengen so pagew kod ukok...yaaay...imminumak labat na dakel ya tabol na laranghita tan dakel ya painawa.... hey!!! agyo gagawen ya .... umpano ikapot toy mumukatan yo... kaskasian met iray mailalo lawas ed sikayo. misasalamatak ed Diyos ya Katawan ta maksil lamet so laman akagalawak lay golf, mangalawak lamet no sabado, manaruan kayo... say Diyos manuna lawas. md