042509A nabibilang, unkukulang

manonton dalan
(kansiyon ya igawan
yoy tuno-pop music so bilang
na balikas)

uran uran manterter ed ulo
nabasaak balet aliwan tanto
uran uran manterter ed ulo
nabasaak balet aliwan tanto

no mankirmat mankarol agko
no mankirmat mankarol agko
antakot ta wala kad abay ko
linglinggisen mo tan lakap mo

no undelap itarok to balet agko
no undelap itarok to balet agko
umpaga ta wala kad abay ko
manim-imis tan napnuay aro

nabibilang, nabibilang,
so agew tayor mundo
nabibilang, nabibilang
so maong ya totoo

unkukulang, unkukulang
saray maaron imano
unkukulang, unkukulang
panangan ya ipadungo

nabibilang, unkukulang, nabibilang
unkukulang, nabibilang, unkukulang
balet say panangarok manando
ta diyad pusok so ayuyang mo
balet say panangarok manando
ta diyad pusok so ayuyang mo
(pawil kayod tagey)

(balibali ya kansiyonen yon walay
hilig ton man "street dancing"-
youtube-egyptian songs-habibi dah)

041609A samyoy pansibeg

manonton dalan

aliknak so petang na takeb mo
simmaip er maaron dakulap ko
samyoy buek moy ambalbalingit
ya inkalesa na liknaan kon mapilit
ya iyapit koy pagew kon unsisibeg
piyan naliknay uyamoy daragedeg

nagngel koray apepet moran balikas
kalakes toy masimsimpit iran kalasakas
na abel lapur galagalaw tan dapdapigas
ya mamepespes na likeliket tan gayaga
ipapasirayew na aping ya mamalbalanga
tan duaran mankulkulirep moran mata

bukbukuran tay apatiran suyok na mundo
pati linak na tawen ya bebegsayey lurem
ya igagayuguy toy mapalpalna ran dagem
taroktarok toy samsamyon angiter na reen
no kugip ya, agko labay so naliing inaro
anggan makasengeg na isaew kod trabaho

041209A singaak asinit

manonton dalan

akinet agko nalikiran iray linggis mo
singa misteryoson petang ya amamayo
ya no agmoak im-immanuen et an-anapen ko
saray imis moy masarag lan panbilay ko
say pilpilalek ko balet dere kadiay daiset
tano ikirem ko et lakap moak na malmalet

niman akaplas moy limak singaak asinit
maruksa kan lawas agmo anggan pinirit
no inanguban moak er saman et milaak
er daluyon ya mantatabugis ya nasaspak
no tampalen toy takdang insan unkamayat
manburaburan laklakapen toy aroy linak

diyar maaron labi akugip takan manbukbukor
aakbibiten kay guligon awawey moy agnakaor
mitimiti-ak ya inasinggeran taka, agak makasalita
insalar koy aping kod pagew mo dengdengelen ko
paroparok tan sibesibek ya makapalemek na puso
aliknak maam-amon puyok susuyureyen toy beneg ko

immuyamo ed maamon puyok

manonton dalan

bibiyeren koy pusok ta mankulagtit
ta akabetak na masanting ya marikit
tinawag koy imano to ay agi manpungit
balet nen say kuanko "agay lay ganam"
kimmmuyep so mata to katekep toy sigam
tan say kabbang toy masimsimpit matantan

akisalukoyak met lan nanpasiyar ed sentro
marakep so tungtung mi agi, kaparami loro
apasikmatan koy tikoy, halohalo tan puto
intagar kon mamainawa tan tawayan irayan lako
manpakipot ni, intabin konin maninda-inda
kasumpalan to et labalabay to met manaya

balibali so iimisan ton wala ni karot
no linglingesen koy mata ton mankulayot
asabit ed bibil toy kinaroy ya niyog
uhmmm! inegnaan ko tan aping toy amamayok
mankelawak agton balot akabesngaw o amasnok
asapigar koy bibil to, immuyamo er maamon puyok

A Blessed Easter To All!

PAKULAT

by Kankanti


Oga-ogaw nin tuloy, agto balet apukpukan
So sabo na dala tan say kagantilan
Baleg ya sakit tan irap kasumpal na siyam bulan
Inatey lawarid inpananak, say tetel ag nasabaan.

Namemeneng, agto amta no anto so alooban
Irap tan problemad bilay, sikato 'yay katuaan,
Abaluan to "bangungot" labat ya naandid kaimbuasan
Manliplimatan mankukugip, pakalikna toy lanang.

Angkekelag ya gamet diad tamoro akapeket
Sangi-sangin singa sibong manaanap na underet;
Dilat-dilat kalamor, manpirawat ya makapangan
Soso'y inan katorse anyos, pakulat ni, anggapo'y iyan!