030710 sasalkuten moak na panangaro

MANONTON DALAN

agko nitepel ya say petang na pagew mo
et unkepan sisiplugey dagem labat
labay kon unkutep ed pusok ya itawag
toy manandon iliw lalo lad isisipot
na liwawad sagur ya kulapulay ermen

natan lilinggisen ko'y uyamo'y lupam
ya mipupuligesgesan ed maruyon kugip
wala niray ungol mon agko naulit
pati ules indepak mo ya angiparungtal
na iimunan daray kalangweran. labay kon
miapag ed samit daray bektan manpainat-inat
tan singa unyesyes so amina laman mo.

inanguban takad tenger, singaak aguyor
na alimbusabos agak makaanges singa
baton balani agak balot makalukpos.
kamamanta wala kalad tapew ya singa genggeng
ya sasalkuten moak na abigobigota aro.
agko anta no abangon kala o wala ka nid
pegley na kugip o wala kalan bilay.

nen biglan asaspak so lupak insan nagngel
takan nguronguro,"kulas antoy ibabagam,
antoy ngaran ko ha! buwisit, manluto kay
pangalmusalan mo" binigsot mo ni ules
aka-eyag-eyagak ni ta intarok toy
magter kon iknol.

...hehehehe gungunam