puson napnoy aro

MANONTON DALAN

mapekepeket so imanok ed saray matam
liknak so sika labat so walad arapan
mesmesan taka komon ya tarok toy geget
balet pinaer ko, wala ray matay asipet
sibersiber ya mananap na itukyap lawas
pusok balet nalelener labay toy unimwas

no nayari labat ya erepen koy agew natan
ta labay kon napunas iray matan balang
tan bukbukuran kon amamayuey kalinggasan
balet masarag lay dengdengelen koy ulaulam
ya milmilay matak ed masimpit mo ran galaw
ya manpapapeles na pukal na puson miaaruan

sakeya bektan abekad lingwan

MANONTON DALAN

ayesyes lay katengeran dan manalagar
ed lulutuen nen nanay ya pigarpigar
nakgaay teek dan manak-akmon-akmon
ginawa da lay plato ya batingting
matalakatak, agmo narengel so esaes
anggan susuyuren lay layag moy anges

inapag lay niluto, sinukat na yaong
anggapoy saulan ta aliwa kunon maong
piritpiriten dalan in-inut lapud eras
ipapangan dala ray angub na asewek
pati siguroy kaabay akinabang ed satan
anggan ilol labat nayari met lan ipangan

atektek so baog, marungis ka no kanen mo
andi bali basta wala ni taway nayari ni
anggan sabit, ngatingaten mon maal-alwar
insan ka unkamot na malaem ya itamukal
amay liknan walay unkarunyas ed kulokulong
pisalsalamatan lay eges, nayari lay unurong

***
pasenya kilan kabaleyan ko asalkotak na
pilalek ya salien koy mansulat na libon
anlong ed salitan sakson... kanyan abayagak
ya ag angikurit ed salita tayon pangasinan.
no labay yon tandagan so sinulat ko
http://www.poemhunter.com/manonton-dalan/poems
walay masulok ya sanlibo diman ya manalagar ed sikayo.
say Diyos manuna lawas, manaruan kayo. md
*** queen natn ko labat apakisyapan may kerew mo
aging.md